తెలంగాణ రాష్ట్రంలోని గురుకుల విద్యాసంస్థల్లో కలుషిత ఆహారం కారణంగా 127 మంది విద్యార్థులు మృతి చెందడం తీవ్ర ఆందోళన కలిగిస్తోంది. ఈ ఘటనపై బీఆర్ఎస్ పార్టీ తీవ్రంగా స్పందిస్తూ, కాంగ్రెస్ ప్రభుత్వం విద్యార్థుల భద్రత విషయంలో నిర్లక్ష్యం వహిస్తోందని ఆరోపించింది.
బీఆర్ఎస్ జిల్లా అధ్యక్షులు, మాజీ ఎమ్మెల్యే రేగా కాంతారావు మాట్లాడుతూ, ఒకప్పుడు గురుకులాల్లో సీటు కోసం తల్లిదండ్రులు తిరిగేవారని, నేడు భయపడుతున్నారని అన్నారు. విద్యార్థుల భద్రత, ఆరోగ్యం విషయంలో ప్రభుత్వ వైఫల్యమే ఈ దుర్ఘటనలకు కారణమని ఆయన ఆరోపించారు.
మణుగూరు బీసీ గురుకుల పాఠశాలలో జరిగిన ఫుడ్ పాయిజన్ ఘటనలో సుమారు 15 మంది విద్యార్థులు అస్వస్థతకు గురై ఆసుపత్రిలో చేరారు. ఆసుపత్రిలో విద్యార్థుల పరిస్థితిని పరామర్శించిన రేగా కాంతారావు, అధికారులు, సిబ్బంది వ్యవహార శైలిపై అసంతృప్తి వ్యక్తం చేశారు.
ఆసుపత్రిలో వైద్యులు, గురుకుల టీచర్లు సరైన విధంగా వ్యవహరించడం లేదని, మీడియా ప్రశ్నలకు బాధ్యతారహితంగా సమాధానాలు ఇస్తున్నారని ఆయన విమర్శించారు. విద్యార్థుల ఆరోగ్యం, భద్రత విషయంలో నిర్లక్ష్యం వహిస్తే కఠిన చర్యలు తీసుకోవాలని డిమాండ్ చేశారు.
నియోజకవర్గ ప్రజాప్రతినిధులు ప్రజల సమస్యలు పట్టించుకోకుండా ఇసుక దందాల్లో బిజీగా ఉండటం దురదృష్టకరమని రేగా కాంతారావు విమర్శించారు. గురుకులాల్లో చదువుతున్న విద్యార్థుల ఆరోగ్యం పట్ల ప్రభుత్వం, అధికారులు నిర్లక్ష్యంగా వ్యవహరిస్తున్నారని ఆగ్రహం వ్యక్తం చేశారు. ఈ ఘటనపై జిల్లా కలెక్టర్ విచారణ జరిపి, బాధ్యులపై చర్యలు తీసుకోవాలని కోరారు.
