ఎల్నినో ప్రభావం: తెలంగాణలో ఆరోగ్యశాఖ హెచ్చరికలు - తాగునీరు, ఆహారం విషయంలో జాగ్రత్తలు

రాష్ట్ర ప్రజలు అప్రమత్తంగా ఉండాలని తెలంగాణ ఆరోగ్యశాఖ సూచించింది. రానున్న కాలంలో పొడి వాతావరణం, తీవ్రమైన వేడి, తాగునీటి కొరత వంటి పరిస్థితులు ఏర్పడే అవకాశం ఉందని హెచ్చరించింది. వీటి కారణంగా నీటి ద్వారా వ్యాపించే వ్యాధులు వడదెబ్బ పోషకాహార లోపం మానసిక ఒత్తిడి వంటి ఆరోగ్య సమస్యలు పెరిగే ప్రమాదం ఉందని తెలిపింది. ప్రజారోగ్యశాఖ విడుదల చేసిన సూచనల్లో భాగంగా ప్రజలు తాగునీటి శుభ్రత వ్యక్తిగత పరిశుభ్రత ఆహార భద్రతపై ప్రత్యేక శ్రద్ధ పెట్టాలని కోరింది. అత్యవసర పరిస్థితులను ఎదుర్కొనేందుకు ప్రభుత్వ ఆరోగ్య కేంద్రాల్లో ప్రత్యేక పడకలు ఐవీ ద్రవాలు అవసరమైన మందులను సిద్ధం చేసినట్లు వెల్లడించింది. ఆశా కార్యకర్తలు అంగన్వాడీ సిబ్బంది ద్వారా ఓఆర్ఎస్ ప్యాకెట్లను కూడా అందుబాటులో ఉంచినట్లు తెలిపింది.

నీటి కొరత సమయంలో కలుషిత నీటి వినియోగం వల్ల విరేచనాలు ఇతర నీటి ద్వారా వ్యాపించే వ్యాధులు వచ్చే అవకాశం ఉందని ఆరోగ్యశాఖ హెచ్చరించింది. తాగునీటిని కనీసం ఒక నిమిషం మరిగించి చల్లార్చిన తర్వాత ఉపయోగించాలని సూచించింది. నీటిని శుభ్రమైన మూత ఉన్న పాత్రల్లో నిల్వ చేసుకోవాలని చేతులను నేరుగా నీటిలో పెట్టకుండా గరిటెతో తీసుకోవాలని పేర్కొంది. మధ్యాహ్నం 12 నుంచి 3 గంటల మధ్య అనవసరంగా బయటకు వెళ్లకుండా ఉండాలని సూచించింది. బయటకు వెళ్లాల్సి వస్తే గొడుగు టోపీ లేదా తలకు వస్త్రం ధరించాలని తగినంత నీరు మజ్జిగ నిమ్మరసం వంటి ద్రవ పదార్థాలు తీసుకోవాలని తెలిపింది.

నీటి కొరత కారణంగా ఇళ్లలో ఎక్కువకాలం నీటిని నిల్వ ఉంచే పరిస్థితులు ఏర్పడవచ్చని దీనివల్ల దోమలు పెరిగే ప్రమాదం ఉందని హెచ్చరించింది. నీటి ట్యాంకులు కూలర్లు బకెట్లను వారానికి కనీసం ఒకసారి శుభ్రం చేసి పూర్తిగా ఆరబెట్టాలని సూచించింది. చిన్నపిల్లలు గర్భిణులు వృద్ధులు గుండె సంబంధిత సమస్యలు లేదా అధిక రక్తపోటు ఉన్నవారిపై ప్రత్యేక శ్రద్ధ పెట్టాలని ఆరోగ్యశాఖ కోరింది. ఎల్నినో పరిస్థితుల్లో ఆరోగ్య సమస్యలను ముందుగానే నివారించేందుకు ప్రజలు ఈ సూచనలు పాటించాలని విజ్ఞప్తి చేసింది.

ఎల్నినో ప్రభావంతో తెలంగాణలో తీవ్రమైన వేడి, నీటి కొరత ఏర్పడే అవకాశం ఉంది. దీనివల్ల నీటి ద్వారా వ్యాపించే వ్యాధులు, వడదెబ్బ, పోషకాహార లోపం వంటి ఆరోగ్య సమస్యలు పెరిగే ప్రమాదం ఉందని తెలంగాణ ఆరోగ్యశాఖ హెచ్చరించింది. ప్రజలు తాగునీరు, ఆహారం విషయంలో అప్రమత్తంగా ఉండాలని, మధ్యాహ్నం వేళల్లో బయటకు వెళ్లడం తగ్గించాలని సూచించింది.