కూరగాయలను కోసిన తర్వాత కడగడం వల్ల వాటిలోని పోషకాలు, ముఖ్యంగా నీటిలో కరిగే విటమిన్లు, ఖనిజ లవణాలు నష్టపోయే ప్రమాదం ఉందని ఆరోగ్య నిపుణులు హెచ్చరిస్తున్నారు. సరైన పద్ధతిలో కూరగాయలను శుభ్రం చేసుకోవాలని వారు సూచిస్తున్నారు.
చాలామంది కూరగాయలను ముందుగా ముక్కలుగా కోసి, ఆ తర్వాత నీటితో శుభ్రం చేస్తుంటారు. అయితే ఈ పద్ధతి వల్ల వాటిలోని కొన్ని పోషకాలు నీటిలో కలిసిపోయే అవకాశం ఉందని పోషకాహార నిపుణులు సూచిస్తున్నారు. ముఖ్యంగా నీటిలో కరిగే విటమిన్లు, ఖనిజ లవణాలు కొంతమేర తగ్గే అవకాశం ఉంది. అందుకే కూరగాయలను కోయడానికి ముందే కడగాలని, ఆ తర్వాతే ముక్కలుగా తరగాలని నిపుణులు సూచిస్తున్నారు.
నీటిలో కలిసిపోయే పోషకాలు
కూరగాయలను చిన్న చిన్న ముక్కలుగా కోసినప్పుడు వాటి ఉపరితల వైశాల్యం పెరుగుతుంది. ఆ తర్వాత నీటిలో కడగడం లేదా ఎక్కువసేపు నానబెట్టడం వల్ల విటమిన్ సి, బి విటమిన్లు, కొన్ని ఖనిజాలు నీటిలోకి వెళ్లిపోవచ్చు. కూరగాయలను ముందుగానే కోసి ఎక్కువసేపు బయట ఉంచినా గాలితో జరిగే చర్యల వల్ల కొన్ని విటమిన్లు తగ్గుతాయి.
సరైన పద్ధతి ఇదే..
కూరగాయలను కోయడానికి ముందు, శుభ్రమైన ప్రవహించే నీటితో కడగాలి. మట్టి, దుమ్ము ఎక్కువగా ఉన్న కూరగాయలను చేతులతో లేదా శుభ్రమైన బ్రష్తో రుద్ది శుభ్రం చేయాలి. కడిగిన తర్వాత నీటిని తొలగించి, ఆపై ముక్కలుగా కోయాలి. కూరగాయలను చిన్న చిన్న ముక్కలుగా కాకుండా అవసరమైన పరిమాణంలో కోయాలి. కోసిన కూరగాయలను ఎక్కువసేపు నీటిలో నానబెట్టకూడదు. వీలైనంత త్వరగా వండుకోవాలి.
సబ్బుతో కడగకూడదు
కూరగాయలపై పురుగుమందుల అవశేషాలు, దుమ్ము, సూక్ష్మజీవులు ఉండే అవకాశం ఉంది. అందువల్ల వాటిని కడగడం తప్పనిసరి. అయితే, సబ్బులు, డిటర్జెంట్లు లేదా ప్రత్యేక శుభ్రపరిచే ద్రావణాలను ఉపయోగించకూడదు. సాధారణంగా ప్రవహించే శుభ్రమైన నీటితో కడగడమే సరైన పద్ధతి.
కూరగాయలను ఎక్కువ నీటిలో ఉడికించి, ఆ నీటిని పారబోయడం వల్ల కూడా నీటిలో కరిగే పోషకాలు తగ్గే అవకాశం ఉంది. అవసరమైనంత నీటితో వండటం, ఆవిరిపై ఉడికించడం వంటి పద్ధతులు పోషకాలను నిలుపుకోవడంలో సహాయపడతాయి.
