దీపావళి, ఇతర పండుగల నేపథ్యంలో ఆహార పదార్థాల నాణ్యత, స్వచ్ఛత విషయంలో ఢిల్లీ ప్రభుత్వం ప్రత్యేక చర్యలు చేపట్టింది. ముఖ్యమంత్రి రేఖా గుప్తా ఆదేశాల మేరకు ఆహార భద్రత విభాగం అధికారులు ఢిల్లీలోని పలు ప్రాంతాల్లోని స్వీట్ల దుకాణాలు, డెయిరీలు, ఆహార తయారీ కేంద్రాల్లో తనిఖీలు నిర్వహించారు.
ఈ తనిఖీల్లో భాగంగా ఈశాన్య ఢిల్లీ, తూర్పు ఢిల్లీ, షాహదరా, దక్షిణ ఢిల్లీ, ఆగ్నేయ ఢిల్లీ ప్రాంతాల్లో మొత్తం 40 ఆహార నమూనాలను సేకరించి ప్రయోగశాలలకు పంపించారు. వీటిలో ఖోవా, పనీర్, నెయ్యి, కలాకండ్, లడ్డూలు, గులాబ్ జామూన్ వంటి పదార్థాలు ఉన్నాయి.
మండోలి ఎక్స్టెన్షన్లోని ఓ డెయిరీలో దుర్వాసన వస్తున్న ఖోవా, కలుషితమైన రసగుల్లాలు, ఈగలు, దోమలు ఉన్న పాలను గుర్తించారు. దీంతో ప్రజల ఆహార వినియోగానికి పనికిరాని సుమారు 100 కిలోల పదార్థాలను అధికారులు ధ్వంసం చేశారు. దక్షిణ, ఆగ్నేయ ఢిల్లీలో మరో 12 ఆహార వ్యాపార సంస్థల్లో తనిఖీలు చేసి 18 నమూనాలను సేకరించారు. నిహాల్ విహార్లోని ఓ స్వీట్ల తయారీ కేంద్రం ఎలాంటి ఎఫ్ఎస్ఎస్ఏఐ నమోదు లేకుండా నడుస్తున్నట్లు గుర్తించారు.
పరిశుభ్రత ప్రమాణాలు పాటించని ఎనిమిది సంస్థలకు అధికారులు సవరణ నోటీసులు జారీ చేశారు. సేకరించిన నమూనాల ప్రయోగశాల నివేదికలు వచ్చిన తర్వాత నిబంధనల ప్రకారం తదుపరి చర్యలు తీసుకోనున్నారు.
పండుగల సమయంలో కల్తీ ఆహార పదార్థాల విక్రయాలను, అపరిశుభ్రతను ఏమాత్రం సహించబోమని ముఖ్యమంత్రి రేఖా గుప్తా స్పష్టం చేశారు. ప్రజలకు సురక్షితమైన, నాణ్యమైన ఆహార పదార్థాలు అందేలా నిరంతరం తనిఖీలు కొనసాగించాలని అధికారులను ఆదేశించారు.
