సొంత స్థలం ఉన్నప్పటికీ, ఇల్లు లేక తీవ్ర ఇబ్బందులు ఎదుర్కొంటున్న ఓ వృద్ధుడు తన సమస్యల పరిష్కారం కోసం ప్రజావాణిని ఆశ్రయించారు. మణుగూరు మండలం రాజుపేటకు చెందిన రాజారాం, నడవలేని స్థితిలోనూ ప్రజావాణికి చేరుకుని, ప్రభుత్వం మంజూరు చేసిన ఇందిరమ్మ ఇల్లు సాంకేతిక కారణాలతో నిలిచిపోవడంతో పాటు, వృద్ధాప్య పెన్షన్ మంజూరు చేయాలని అధికారులను కోరారు.
రాజారాం తెలిపిన వివరాల ప్రకారం, ప్రభుత్వం మంజూరు చేసిన ఇందిరమ్మ ఇల్లు సాంకేతిక కారణాలతో మధ్యలోనే నిలిచిపోయింది. దీంతో ఎన్నో ఏళ్లుగా రేకుల ఇంట్లోనే నివాసం ఉంటూ వర్షాలు, ఎండల మధ్య తీవ్ర ఇబ్బందులు ఎదుర్కొంటున్నట్లు ఆయన ఆవేదన వ్యక్తం చేశారు. ఇంటి నిర్మాణం పూర్తి చేయించేందుకు పలుమార్లు సంబంధిత అధికారుల కార్యాలయాల చుట్టూ తిరిగినా ఫలితం లేకపోయిందని తెలిపారు.
ప్రస్తుతం ఆరోగ్య పరిస్థితి కూడా బాగాలేక నడవడానికి సైతం ఇబ్బందిగా ఉన్నప్పటికీ, న్యాయం కోసం ప్రజావాణికి రావాల్సి వచ్చిందని రాజారాం పేర్కొన్నారు. తనకు మంజూరైన ఇందిరమ్మ ఇంటిని త్వరితగతిన పూర్తి చేసి అందజేయాలని, అలాగే జీవనాధారంగా వృద్ధాప్య పెన్షన్ను కూడా మంజూరు చేయాలని ఆయన అధికారులను కోరారు. పేదరికం, అనారోగ్యంతో ఇబ్బందులు పడుతున్న తన పరిస్థితిని దృష్టిలో ఉంచుకుని, ప్రభుత్వం మానవతా దృక్పథంతో స్పందించాలని వేడుకున్నారు.
రాజారాం సమర్పించిన వినతిపత్రాన్ని స్వీకరించిన అధికారులు, సమస్యను పరిశీలించి సంబంధిత శాఖల ద్వారా నివేదిక తెప్పించి తగిన చర్యలు తీసుకుంటామని హామీ ఇచ్చినట్లు తెలిసింది. అయితే, ఇల్లు, పెన్షన్ సమస్యలు ఎప్పుడు పరిష్కారమవుతాయోనని రాజారాం ఆశగా ఎదురుచూస్తున్నారు. ప్రజావాణిలో తనకు న్యాయం జరుగుతుందనే నమ్మకంతో అధికారుల స్పందన కోసం ఆయన ఎదురుచూస్తున్నారు.
