ఆంధ్రప్రదేశ్లో పెట్టుబడులు పెట్టేందుకు గుజరాత్ పారిశ్రామికవేత్తలను రాష్ట్ర ప్రభుత్వం ఆహ్వానించింది. అహ్మదాబాద్లో జరిగిన సీఐఐ భాగస్వామ్య సదస్సు రోడ్షోలో రాష్ట్రంలోని పెట్టుబడి అవకాశాలను పారిశ్రామిక రంగ ప్రతినిధులకు వివరించారు. సాంకేతికత, తయారీ, లాజిస్టిక్స్, హరిత ఇంధనం వంటి రంగాల్లో అవకాశాలున్నాయని తెలిపారు.
2025-26 ఆర్థిక సంవత్సరం తొలి తొమ్మిది నెలల్లో దేశవ్యాప్తంగా ప్రతిపాదిత పెట్టుబడుల్లో ఆంధ్రప్రదేశ్ వాటా 25.3 శాతంగా ఉందని రాష్ట్రం పేర్కొంది. అయితే, పెట్టుబడుల ప్రకటనలకే పరిమితం కాకుండా, ప్రతిపాదిత ప్రాజెక్టులను వేగంగా కార్యరూపంలోకి తీసుకురావడంపై ప్రధానంగా దృష్టి సారిస్తున్నట్లు వెల్లడించింది.
పెట్టుబడుల విషయంలో వేగం, స్థిరత్వం, సేవలు అనే మూడు అంశాలను కీలకంగా ముందుకు తీసుకెళ్తున్నట్లు రాష్ట్ర ప్రభుత్వం తెలిపింది. ప్రాజెక్టులకు అనుమతులు, ప్రభుత్వ శాఖల మధ్య సమన్వయం, అమలు ప్రక్రియను వేగవంతం చేయడంపై దృష్టి పెడుతున్నట్లు పేర్కొంది.
ఆంధ్రప్రదేశ్లో ఎలక్ట్రానిక్స్, హరిత ఇంధనం, ఔషధాలు, ఉక్కు, డ్రోన్లు, ఆక్వాకల్చర్, అధునాతన తయారీ తదితర రంగాలకు సంబంధించిన 23 రంగాల క్లస్టర్లను అభివృద్ధి చేస్తున్నట్లు రాష్ట్ర ప్రభుత్వం వెల్లడించింది. ప్రాజెక్టుల అమలు వేగాన్ని పెంచేందుకు మంత్రుల స్థాయిలో ఫైళ్ల పరిష్కార వేగాన్ని కూడా సమీక్షిస్తున్నట్లు ఇటీవల మంత్రి నారా లోకేశ్ తెలిపారు.
దేశంలో పారిశ్రామిక రంగంలో గుజరాత్కు ఉన్న అనుభవాన్ని ప్రస్తావిస్తూ, పారిశ్రామిక వృద్ధి, మౌలిక సదుపాయాలు, వ్యాపార అనుకూల వాతావరణంలో గుజరాత్తో భాగస్వామ్యం ద్వారా కొత్త అవకాశాలు సృష్టించుకోవచ్చని ఏపీ ప్రభుత్వం పేర్కొంది.
తూర్పు తీరంలో వ్యూహాత్మక స్థానం, విస్తృత భౌగోళిక పరిధి, పరిశ్రమలకు అనుకూలమైన రంగాల విస్తరణతో ఆంధ్రప్రదేశ్లో పెట్టుబడులకు అవకాశాలు ఉన్నాయని పారిశ్రామికవేత్తలకు వివరించింది. గుజరాత్ వ్యాపార అనుభవం, ఆంధ్రప్రదేశ్లోని పెట్టుబడి అవకాశాలు కలిస్తే కొత్త పారిశ్రామిక భాగస్వామ్యాలు ఏర్పడే అవకాశం ఉందని ప్రభుత్వం పేర్కొంది.
రండి.. ఆంధ్రప్రదేశ్తో కలిసి నిర్మించండి అంటూ గుజరాత్ పారిశ్రామికవేత్తలకు రాష్ట్రం ఆహ్వానం పలికింది.
