మాజీ ఐఏఎస్ దివ్య మిత్తల్ కొత్త పార్టీ ప్రకటన.. 2027 యూపీ ఎన్నికల్లో పోటీకి సిద్ధం - రాజకీయ ప్రభంజనం

ప్రజలను విధానాల రూపకల్పనలో భాగస్వాములను చేయడం, వారి అవసరాలకు అనుగుణంగా నిర్ణయాలు తీసుకోవడం, ప్రభుత్వ పనితీరుపై ప్రజలకు జవాబుదారీతనం ఉండేలా చూడటం తమ పార్టీ ప్రధాన లక్ష్యాలని తెలిపారు.

ప్రజలే విధానాల రూపకర్తలు

సామాజిక మాధ్యమాల్లో విడుదల చేసిన వీడియో సందేశంలో దివ్య మిత్తల్ తమ పార్టీ మూడు ప్రధాన సూత్రాలను వివరించారు. ప్రభుత్వ విధానాల రూపకల్పనలో సామాన్య ప్రజలకు ప్రాధాన్యత ఇవ్వడం మొదటి లక్ష్యమని చెప్పారు. రైతులకు సంబంధించిన నిర్ణయాల్లో రైతుల అభిప్రాయాలు, వ్యాపార విధానాల్లో వ్యాపారుల సూచనలు, విద్యా వ్యవస్థలో తల్లిదండ్రులు, విద్యార్థుల అవసరాలకు ప్రాధాన్యత ఇవ్వాలని పేర్కొన్నారు.

రెండవ సూత్రం ప్రకారం, వ్యక్తుల గుర్తింపు లేదా ఇతర అంశాలకంటే వారి అవసరాలను బట్టి నిర్ణయాలు తీసుకోవాలని ఆమె తెలిపారు. మూడవ సూత్రం ప్రభుత్వ పనితీరుపై ప్రజలకు జవాబుదారీతనం కల్పించడం. ఎన్నికల సమయంలో మాత్రమే కాకుండా, ఐదేళ్ల పాలన మొత్తం ప్రజల ప్రశ్నలకు ప్రభుత్వం సమాధానం చెప్పే విధానం ఉండాలని ఆమె అభిప్రాయపడ్డారు.

మిర్జాపూర్ నుంచి రాజకీయ ప్రస్థానం

తాజా కథనాల ప్రకారం, దివ్య మిత్తల్ మిర్జాపూర్ సదర్ అసెంబ్లీ నియోజకవర్గం నుంచి పోటీ చేయనున్నట్లు ప్రకటించారు. గతంలో ఆమె మిర్జాపూర్ జిల్లా కలెక్టర్గా పనిచేశారు. ఆ ప్రాంతంతో తనకున్న పరిపాలనా అనుభవం నేపథ్యంలో అక్కడి నుంచే రాజకీయ ప్రయాణాన్ని ప్రారంభించేందుకు సిద్ధమయ్యారు.

ఐఐటీ, ఐఐఎం విద్య.. 13 ఏళ్ల పరిపాలనా అనుభవం

హర్యానాలోని రేవారీకి చెందిన దివ్య మిత్తల్ ఢిల్లీ ఐఐటీలో, బెంగళూరులోని ఐఐఎంలో విద్యనభ్యసించారు. అనంతరం లండన్లో కొంతకాలం పనిచేసి, భారతదేశానికి తిరిగి వచ్చి యూపీఎస్సీ సివిల్ సర్వీసెస్ పరీక్షలో ఉత్తీర్ణత సాధించారు. 2013 బ్యాచ్ ఉత్తరప్రదేశ్ కేడర్ ఐఏఎస్ అధికారిగా సేవలు ప్రారంభించారు.

తన కెరీర్లో సంత్ కబీర్ నగర్, మిర్జాపూర్, డియోరియా జిల్లాల్లో కలెక్టర్గా పనిచేశారు. రాష్ట్ర ప్రభుత్వ రెవెన్యూ విభాగంలో ప్రత్యేక కార్యదర్శిగా కూడా బాధ్యతలు నిర్వహించారు. ఆమె రాజీనామా న ఉత్తరప్రదేశ్ ప్రభుత్వం దాన్ని ఆమోదించింది.

భారీ ప్రకటనలు, అధిక ఖర్చుతో కూడిన ప్రచారానికి బదులుగా ప్రజల వద్దకు నేరుగా వెళ్లి తమ విధానాలను వివరించాలని దివ్య మిత్తల్ భావిస్తున్నారు. ప్రతి గ్రామం, ప్రతి కుటుంబం తమ రాజకీయ కార్యక్రమంలో భాగస్వామి కావాలని ఆమె పిలుపునిచ్చారు. ప్రజలు తమ సమస్యలను నేరుగా తెలియజేయడానికి ఫోన్, వాట్సాప్ ద్వారా సంప్రదించాలని కోరారు.

2027 ఉత్తరప్రదేశ్ అసెంబ్లీ ఎన్నికల నేపథ్యంలో కొత్త పార్టీ ప్రకటన రాజకీయంగా చర్చనీయాంశంగా మారింది. అయితే, పార్టీకి ప్రజల నుంచి లభించే మద్దతు, అభ్యర్థుల ఎంపిక, ఎన్నికల ప్రణాళిక వంటి అంశాలు రానున్న రోజుల్లో స్పష్టమవుతాయి.