మానుగూరు, 2 August
మణుగూరు మండలం చేపల మార్కెట్ ఏరియాలో నిర్మించిన బ్రిడ్జి పక్కన రోడ్డు లేకపోవడం, ఉన్న కొద్దిపాటి రోడ్డుకు గ్రావెల్, మట్టి పోయకపోవడంతో వాహనాలు బురదలో దిగబడుతున్నాయి. ఈ సమస్యపై స్థానికులు తీవ్ర ఆందోళన వ్యక్తం చేస్తున్నారు. ఇటీవల ఒక వ్యక్తి తన కుటుంబంతో సహా స్కూటీపై వెళుతుండగా, వాహనం మట్టిలో కూరుకుపోవడంతో తీవ్ర ఇబ్బందులు ఎదుర్కొన్నారు.
మణుగూరు మండలం చేపల మార్కెట్ ఏరియాలో రోడ్డు నిర్మాణ లోపం స్థానికులకు తీవ్ర ఇబ్బందులు కలిగిస్తోంది. బ్రిడ్జిని బాగానే నిర్మించినప్పటికీ, దాని పక్కన ఉన్న చిన్నపాటి రోడ్డును నిర్మించకపోవడం, గ్రావెల్ పోయకుండా మెత్తటి మట్టిని పోయడంతో సమస్య మరింత జటిలమైంది. చిన్నపాటి వర్షానికే రోడ్డుపై వాహనాలు దిగబడుతున్నాయి. కనీసం నడిచి వెళ్లేందుకు కూడా వీలు లేకుండా దుస్థితి నెలకొంది.
ఈ క్రమంలోనే చేపల మార్కెట్ ఏరియాలో ఒక వ్యక్తి తన భార్య, పాపతో కలిసి స్కూటీపై వెళుతుండగా, బ్రిడ్జి సమీపంలో స్కూటీ మట్టిలో దిగబడిపోయింది. ఎంత ప్రయత్నించినా స్కూటీని బయటకు తీయలేక ఆ వ్యక్తి తీవ్ర అవస్థలు పడ్డాడు. ఈ ఘటనతో స్థానికంగా రోడ్డు సమస్యపై తీవ్ర చర్చ జరుగుతోంది. ఆ రోడ్డును కూడా నిర్మించినట్లయితే ఇబ్బందులు తొలగిపోయేవి.
సంబంధిత పాలకులు, అధికారులు వెంటనే చేపల మార్కెట్ ఏరియాలో ఉన్న రోడ్డుపై దృష్టి సారించి, వాహనదారులకు, పాదాచారులకు ఇబ్బందులు కలగకుండా సమస్యను పరిష్కరించాలని అటుగా వెళుతున్న ప్రజలు, స్థానికులు కోరుతున్నారు.
