మాజీ కేంద్రమంత్రి, రాజ్యసభ సభ్యురాలు గారపాటి రేణుకా చౌదరి సోమవారం మణుగూరులో పర్యటించి కాంగ్రెస్ పార్టీ శ్రేణుల్లో నూతన ఉత్తేజాన్ని నింపారు. ఆమె పర్యటన సందర్భంగా కాంగ్రెస్ పార్టీ జిల్లా నాయకులు గురిజాల గోపి ఆధ్వర్యంలో ఘన స్వాగతం లభించింది.
రేణుకా చౌదరి పర్యటనలో భాగంగా, పివి కాలనీ క్రాస్ రోడ్డు నుండి పట్టణంలోని క్యాంపు కార్యాలయం వరకు యూత్ కాంగ్రెస్ నాయకులు గురిజాల సందీప్ ఆధ్వర్యంలో సుమారు మూడు వందల బైకులు, ఆటోలతో కూడిన భారీ ర్యాలీని నిర్వహించారు. ఈ ర్యాలీ పట్టణంలో సందడిని సృష్టించింది.
అనంతరం, అంబేద్కర్ సెంటర్ వద్దకు చేరుకున్న రేణుకా చౌదరి, ట్రాక్టర్ ను నడుపుకుంటూ వెళ్లి డాక్టర్ బి.ఆర్. అంబేద్కర్ విగ్రహానికి పూలమాలలు వేసి నివాళులర్పించారు. ఆమె కోసం ప్రత్యేకంగా తయారు చేసిన గజమాలను సైతం విగ్రహానికి అలంకరించారు.
ఈ సందర్భంగా రేణుకా చౌదరి మాట్లాడుతూ, జిల్లాలో కాంగ్రెస్ పార్టీలో తిరుగులేని నాయకుడిగా ఉన్న గురిజాల గోపికి మణుగూరు వస్తానని ఇచ్చిన మాట నిలబెట్టుకున్నానని తెలిపారు. అనంతరం, గురిజాల గోపి నివాసానికి వెళ్లి ఆయన కుటుంబ సభ్యులతో కలిసి భోజనం చేసి, వారితో కాసేపు ముచ్చటించారు.
సుమారు మూడు గంటల పాటు సాగిన రేణుకా చౌదరి మణుగూరు పర్యటన, నృత్యాలు, డప్పు వాయిద్యాలతో ఉత్సాహంగా సాగింది. ఈ పర్యటన కాంగ్రెస్ పార్టీ కార్యకర్తలలో నూతన ఉత్సాహాన్ని నింపిందని పార్టీ వర్గాలు తెలిపాయి.
